Avokati, Aridan Bajraktari ka thënë se nëse Kuvendi nuk konstituohet deri më 26 korrik, kur edhe përfundon afati 30 ditor i dhënë nga Gjykata Kushtetuese, i takon kësaj të fundit të vendos se çfarë do të ndodhë.
Ai ka thënë se Gjykata Kushtetuese në aktgjykimin e fundit ka dhënë afat, por nuk ka treguar për pasojat nëse nuk respektohet.
“Kjo është një precedent që nuk ka ndodhur më parë. Çka është e mirë në këtë proces është që Gjykata Kushtetuese e ka vendos tashmë një standard që Kuvendi duhet të konstituohet brenda afatit prej 30 ditësh nga certifikimi i rezultateve. Mirëpo i mbetet Gjykatës Kushtetuese të vendos çka pas 30 ditëve, sepse ka qenë e pamjaftueshme vetëm vendosja e afatit dhe jo e pasojës nësë nuk konstituohet Kuvendi”, ka thënë Bajraktari në emisionin “Ditari” në Tëvë1.
Sipas tij, opsionet e përmendura nëse nuk konstituohet Kuvendi, si marrja e mandatit të deputetëve ose shkuarja në zgjedhje të reja janë hipoteza që nuk kanë bazë të Kushtetutë, ligj apo praktik.
“Janë përmendur dhe përmenden lloj- lloj opsione që nga decertifikimi i disa deputetëve aktual, që nënkupton me ardh në shprehje deputetët të tjerë të subjekteve që në fakt nuk besoj që është ndonjë zgjidhje oportune, për faktin se vetëm sa mund ta zvarrisë procesin e deri tek mundësia e shkuarjes në zgjedhje, që në bindjen time poashtu, besoj që nuk njëri prej opsioneve, sepse dhe në aktgjykimin e Gjykatës Kushtetuese të vitit 2014 dhe në këtë aktgjykim e ka thënë se moszgjidhja e kryetarit të Kuvendit dhe moskonstitumi përkatësish zgjedhja e nënkryetarëve nuk ka dispozitë kushtetuese që e qon vendin në zgjedhje”, ka vlerësuar Bajraktari.
