Avokati, Ardian Bajraktari ka deklaruar se nga sot deputetët e zgjedhur me datë 9 shkurt fillojnë mandatin e tyre, duke filluar me rastin e certifikimit.
Bajraktari thotë se anëtarët e Qeverisë të cilët janë zgjedhur deputet në Kuvendin e Kosovës do të duhej të japin dorëheqje para zgjedhjeve.
“Nga sot deputetët e Kuvendit të Kosovës, deputetët e zgjedhur me datë 9 shkurt fillojnë mandatin e tyre. Mandati i deputetit sipas dispozitës së Kushtetutës fillon me rastin e certifikimit. Është esenciale me kuptua në sistemin tonë kushtetues njëkohësisht nuk mund t`i ushtrosh dy funksione edhe anëtar qeverie edhe deputet në Kuvendin e Kosovës. Anëtarët e Qeverisë të cilët janë zgjedhur deputet në Kuvendin e Kosovës, do të duhej para zgjedhjeve të ofronin dorëheqje, mirëpo në rast se nuk e bëjnë një gjë të tillë natyrisht ndaj tyre nuk parashihet ndonjë sanksion në kuadër të dispozitave legjislacionit në fuqi”, ka deklaruar avokati.
Sipas avokatit, konstituimi i Kuvendit të Kosovës duhet të bëhet nga sot dhe jo më vonë se 30 ditë, ku detyrë e institucionit të presidentit është të thërret seancë konsuive.
“Nga ky moment vjen në shprehje roli i institucionit të presidentit në drejtim të konstituimit të institucioneve në drejtim të diskutimeve me subjektet politike të cilat kane fituar ulësen në Kuvendin e Kosovës në rrjedhë të kësaj fillimisht duhet të bëhet konstituimi i Kuvendit, duhet të bëhet nga sot jo më vonë se 30 ditë është natyrisht detyrë dhe përgjegjësi e institucionit të presidentit ta thërret seancën konsuive e cila natyrisht që drejtohet nga personi më i moshuar, i ndihmuar nga personi më i ri”, ka thënë avokati.
Sa i përket formimit të Qeverisë, avokati thotë se nëse partia fituese nuk mund të krijojë qeverinë, duhet të ketë bashkëpunim dhe koalicion.
“Vlerësoj që do të duhej që LVV ta ftojë në koalicion një prej partive opozitare për formimin e Qeverisë pasi nuk i ka mjaftueshëm numrat e deputetëve, një bashkëpunim i tillë i subjekteve politike është i nevojshëm dhe i domosdoshëm në të mirën e vendit para së gjithash. Në momentin që subjekti politik fitues i zgjedhjeve nuk arrin të krijojë qeverinë sipas dispozitave kushtetutës, atëherë vjen në shprehje subjektet tjera natyrisht që kanë vullnet për ta bërë një gjë të tillë sipas kushtetues”, tha ai ndër të tjera në emisionin “Ditari” në Tëvë1./teve1.info/
