Lidhja Demokratike e Kosovës ka dorëzuar kallëzim penal ndaj kryeministrit në detyrë, Albin Kurti, dhe ministrave në detyrë të cilët janë zgjedhur deputetë.
Kallëzimi u tha se po dorëzohet për “keqpërdorim të detyrës zyrtare dhe tejkalim të autorizimeve”.
Në Prokurorinë Speciale për të dorëzuar kallëzimin penal kanë shkuar deputetet e LDK-së, Hykmete Bajrami dhe Doarsa Kica-Xheleli.
E për këtë, avokati Ardian Bajraktari ka thënë se anëtarët e ekzekutivit janë në shpërputhje me nenin 72 të Kushtetutës së Kosovës.
Sipas tij, se a ka elemente të veprës penale, mbetet të shihet përmes ndërmarrjes së veprimeve nga ana e Prokurorisë.
“Në bindjen time para së gjithash kemi të bëjmë me pajtueshmërinë e një funksioni të deputetit për faktin se Kushtetuta është shumë e qartë dhe në këtë drejtim natyrisht që ushtrimi çfarëdo funksioni tjetër përfshirë edhe anëtarët e ekzekutivit me bindjen time është në shpërputhje me nenin 72 të Kushtetutës së Kosovës, se a kemi elemente të veprës penale mbetet të shihet përmes ndërmarrjes së veprimeve nga ana e Prokurorisë. Para hudhjes së kallëzimit penal Prokurori është i obliguar që të konsultohet me kryeprokurorin e Prokurorisë përkatëse dhe për këtë të mbajë shënim zyrtar”, ka deklaruar ai në emisioin “Ditari” në Tëvë1.
Bajraktari ka folur edhe për propozimin e LDK-së për krijimin e një qeverie tranizicionale. Ai thotë se në sistemin kushtetues nuk njihet fjala qeveri tranzicionale.
“Sa i përket definicionit saktë qeveri tranzicionale që është e vërteta në sistemin kushtetues nuk e njeh si të tillë, përcakton dispozita të qarta edhe Kushtetuta por edhe aktgjykimet e Gjykatës Kushtetuese”, tha ai ndër të tjera./teve1.info/
