Mesfushori i skuadrës së Prishtinës, Blend Baftiu e ka fituar epitetin e futbollistit më të mirë për xhiron e tetë të Superligës së Kosovës në futboll.
Federata e Futbollit të Kosovës, ka bërë të ditur të martën se Baftiu është shpallur “Ylli i Javës”, çmim ky që ndahet për futbollistin me performancën më të mirë pas përfundimit të secilës xhiro.
Komisioni i Veteranëve të futbollit, ka vlerësuar lartë paraqitjen e Baftiut, duke e konfirmuar si më të mirin për xhiron e fundit.
Në fakt, Baftiu ishte më i merituari që Prishtina e fitoi derbin ndaj Ballkanit 1:0, pasi shënoi golin e vetëm të takimit dhe atë në minutat shtesë.
Baftiu është shprehur tejet i lumtur me vlerësimin, ndërsa ka shtuar se çmimin ia dedikon bashkëlojtarëve të tij te Prishtina që japin kontribut të madh, por edhe tifo-grupit “Plisat” që po e përkrahin ekipin në çdo ndeshje.
Ai ka thënë se synimi i Prishtinës mbetet titulli i kampionit, ndërsa ka shtuar se shpreson të vazhdojë me formën e mirë për ta ndihmuar skuadrën në ndeshjet e ardhshme.
Aktualisht, Prishtina prinë në Superligë me 19 pikë të mbledhura, katër më shumë se Ballkani që renditet i dytë në tabelë.
