Xhudistja, Laura Fazliu është duke ia zbardhur “ftyrën” Kosovës në arenën ndërkombëtare, derisa të mërkurën u kurorëzua me medalje të argjendtë në Mastersin e xhudos në Jerusalem.
Megjithatë nga familja Fazliu, Laura nuk është e vetme që po i shërben atdheut, edhe babai i saj Musli Fazliu është duke e bërë krenar vendin e tij. Musliu po e kryen me sukses detyrën e tij si polic, derisa po ruan rendin dhe qetësinë në veri te Kosovës, teksa situata është e brishtë por edhe jostabile nga grupet kriminale serbe.
22-vjeçarja është krenare me babanë e saj, por krenar me të bijën është edhe vetë Muslia, i cili me shokë po qëndrojnë në pjesën e veriut te Kosovës që afro dy javë. Babain e kishte në detyrë, por gjatë asaj kohe Laura ishte duke luftuar dhe po festonte medaljen e saj në Jerusalem.
“Babi është në veri për rreth 12-13 ditë. Ndihem krenare për të. Ai po e bën punën e vetë, si çdo polic tjetër”, thotë Fazliu për “Gazetën Express”.
Nënkampionia e Evropës përveç që siguroi medaljen e argjendtë ajo mori me veti edhe 1200 pikë olimpike, që i siguron pjesëmarrje në Olimpiadën e Parisit 2024. Fazliu është ndierë e lumtur për medaljen, por që synimi i saj është Olimpiada Paris 2024.
“Jam shumë e lumtur për këtë medalje. Është hera ime e parë që marr pjesë në Masters. Me këtë medalje e kam parë që jam në rrugën e duhur drejt Olimpiadës. Normal, qëllimi kryesor është Olimpiada, synimet i kam aty”, shton ajo.
E lëvdata për Fazliun kishte edhe trajneri Driton Kuka: “Laura Fazliu ishte e mrekullueshme sot, pothuajse e çmendur. Mposhti kolore botërore deri në finale. Rrugëtimi i saj drejt Olimpiadës është i sigurt, s’ka më dilema aspak. Ajo i mori 1260 pikë olimpike”, ka shkruar trajneri më i mirë në botë në rrjetin social “Facebook”.
Laura Fazliu e cila është nënkampione e Evropës synon ta ndjek rrugën e Majlinda Kelmendit, Nora Gjakovës e Distria Krasniqit.
