Trajneri Shpëtim Babaj ka dhënë dorëheqje nga posti i tij te Prishtina e Re, ekip që këtë sezon po debuton në Superligën e Kosovës në futboll.
Dorëheqjen e tij, Babaj e ka bërë publike me anë të një postimi në rrjetet sociale të hënën, duke e vlerësuar si akt profesional dhe i menduar me përgjegjësi të plotë.
Ai ka thënë se po largohet me bindjen se ky ndryshim në shtabin teknik do ti shërbejë energjisë së re dhe progresit të klubit.
Po ashtu, Babaj ka falënderuar të gjithë kryesinë e klubit, ndërsa ka zbuluar s kjo është dorëheqja e tretë dhe e fundit për t’u larguar nga posti i trajnerit.
Babaj para fillimit të këtij sezoni ishte emëruar drejtor sportiv te Prishtina e Re, përpara se ta marrë detyrën e trajnerit pas largimit të Elon Berishës pas xhiros së pestë.
Aktualisht, Prishtina e Re është e fundit në tabelë me 11 pikë të mbledhura pas 14 ndeshjeve të luajtura në Superligë.
