Babai i një ushtari izraelit që po mbahet peng në Gaza ka akuzuar kryeministrin, Benjamin Netanyahu të dielën se kishte braktisur pengjet në favor të zgjatjes së luftës në Gaza për interesat e tij politike.
“Në gjithë botën, të gjithë thonë se një armëpushim dhe kthimi i pengjeve duhet të jetë prioriteti kryesor. Megjithatë ne shohim një kryeministër që po braktis ushtarët dhe po dërgon më shumë në betejë”, tha Hagai Angrest, babai i ushtarit Matan, për të përditshëm Maariv.
“Na u tha se kjo luftë nuk do të përfundonte pa ta. Por tani duket se Netanyahu po zgjedh mbijetesën e tij politike mbi jetën e atyre që janë në robëri,” tha ai.
Të shtunën mbrëma, Netanyahu pohoi në një fjalim televiziv se nuk ka “zgjidhje” përveç vazhdimit të luftës në Gaza, duke pohuar se një marrëveshje armëpushimi me Hamasin “do të minonte përfitimet e luftës”.
Të enjten, udhëheqësi i Hamasit në Gaza, Khalil Al-Hayya theksoi se grupi i tij është i gatshëm të angazhohet në negociata gjithëpërfshirëse që do të siguronin lirimin e të gjithë pengjeve izraelitë në këmbim të një armëpushimi të plotë, tërheqjes izraelite nga Gaza, përpjekjeve për rindërtim dhe heqjes së rrethimit.
Një zëdhënës i kryeministrit izraelit tha të shtunën se marrja e të gjithë robërve izraelitë në një marrëveshje është “e pamundur”, ka raportuar Anadoly.
Vlerësimet izraelite sugjerojnë se 59 robër mbeten në Gaza, me 24 që besohet se janë gjallë. Në të kundërt, mbi 9,500 palestinezë mbeten të burgosur në Izrael në kushte të vështira, duke përfshirë raportet e torturës, urisë dhe neglizhencës mjekësore, sipas organizatave të të drejtave palestineze dhe izraelite.
Më shumë se 51,200 palestinezë janë vrarë në Gaza që nga fillimi i luftës së Izraelit në Gaza, shumica prej tyre gra dhe fëmijë.
