Kryetari i Sindikatës së Punonjësve të Sektorit Privat në Kosovë, Jusuf Azemi, ka thënë se Qeveria e Kosovës po i trajton punëtorët e sektorit privat si skllevër.
Azemi, ka thënë se është krijuar një bindje që Inspektorati i Punës, me pronarë të kompanive dhe me pushtetin, janë një trekëndësh të lidhur mes veti, ku e gjithë barrën po e paguajnë punëtorët e sektorit privat.
“Këtë e kemi thënë dhe po dhurojmë argumente të mjaftueshme, ne kemi punëtorë që paguhet me 170 euro, dhe këto me këtë shumë iu hiqen edhe kontributet që kanë, ku shpeshherë bien në 155 euro. Pse themi skllevër, sepse ne kemi Inspektoratin e Punës, i cili e mbikëqyrë këtë natyrë të punës dhe në momentin që ata nuk reflektojnë, ne jemi të vetëdijshëm që më 20-30 inspektorë nuk kryhet e gjithë natyra e punës në këtë vazhdë që ne po e kërkojmë, por mos të kemi sinjale të vogla pozitive. Ne kemi krijuar një bindje, edhe në të kaluarën edhe tashmë, që Inspektorati i Punës me pronarë të kompanive dhe me pushtetin janë një trekëndësh të lidhur mes veti dhe gjithë këtë barrë po e paguajmë ne”, tha Azemi në emisionin “Info Nata” në Tëvë1.
Sipas Azemit, në kuadër të sektorit privat, hallkat e shtetit nuk janë duke funksionuar.
“Kemi raste para katër viteve, që kemi kërkuar një raport zyrtar për një punëtor të larguar në një kompani në Pejë, dhe sot pas katër viteve, përkundër insistimit edhe tonit edhe të vetë punëtorit që është larguar, për katër vite ende nuk kemi një raport zyrtar të Inspektoratit me vlerësua. Ne nuk duam të hymë aty se kush ka pasur të drejt. Inspektorati është i obliguar që ta paraqet një raport zyrtar, me thënë që punëtori ose ka të drejt ose nuk ka, dhe vetë ky fakt kur edhe sot po vazhdon, të bën me dije që nuk po funksionojnë hallkat e shtetit”, tha ai.
Azemi, ka thënë se personat që janë të punësuar duhet stimuluar, përndryshe punojnë në vende të tjera që me të njëjtën punë paguhen më shtrenjtë.
“Ne e dimë që ka buxhet, sepse të gjithë jemi të vetëdijshëm që po thuhet se kemi mbi 700 e 60 milionë në buxhetin e Kosovës, dhe duhet së paku me një pagë minimale këta punëtorë duhet të stimuluar, përndryshe po ka vende tjera që po iu ofrojnë për të njëjtën punë edhe 400 euro”, shtoi ai. /teve1.info/
