Avokati dhe analisti politik Azem Vllasi, në emisionin “Mesditë” në Tëvë1, ka shprehur shqetësimin e tij lidhur me qëndrimin e Lëvizjes Vetëvendosje për zgjedhjet presidenciale, duke theksuar se ende nuk ka një vendim të qartë nëse kjo parti do ta propozojë Vjosa Osmanin për një mandat të dytë si presidente.
Vllasi ka thënë se një situatë e tillë mund ta fusë Kosovën në një krizë të panevojshme politike, sidomos nëse moszgjedhja e presidentit çon drejt zgjedhjeve të reja.
“Nëse dikujt i bie ndërmend ta fusë Kosovën në një situatë të zgjedhjeve të reja vetëm për shkak se nuk po zgjidhet presidenti, atëherë kjo do të ishte e papranueshme”, ka deklaruar Vllasi.
Ai ka shtuar se përgjegjësia kryesore në këtë rast i takon partisë më të madhe në Kuvend, duke aluduar në Vetëvendosjen.
“Nëse VV-ja, si partia me numrin më të madh të deputetëve, e voton kryetarin e Kuvendit, por nuk e voton dhe nuk e përkrah Vjosa Osmanin për presidente, atëherë përgjegjësia bie mbi ta”, ka theksuar ai.
Sipas Vllasit, nëse për shkak të një qëndrimi të tillë vendi shkon në zgjedhje të reja, elektorati duhet ta ndëshkojë politikisht Vetëvendosjen.
“Nëse ata bëhen shkaktarë për zgjedhje të reja, atëherë votuesit duhet t’ua përgjysmojnë mbështetjen dhe të mos i lënë më në pozitë”, ka përfunduar Vllasi.
