Qindra leje ndërtimore të ndërtimit të lartë nga viti 2017 e deri më tash, dyshohet se janë lëshuar në kundërshtim me ligjin në Komunën e Ferizajit.
Kështu thonë nga organizata joqeveritare AVONET, duke theksuar se këtë e vërteton edhe vendimi i Gjykatave të Kosovës për anulimin e pëlqimit të Planit Zhvillimor Komunal 2017-2025.
“Këto shkelje ligjore të konstatuara nga gjykatat që trajtuan këtë çështje, nuk janë shkelje ligjore thjeshtë të natyrës administrative, por ato janë shkelje ligjore të përcjellura me falsifikim dhe dorëzim të dokumenteve me përmbajtje të rreme në MMPHI, nga zyrtarët e Komunës së Ferizajt, shkelje të cilat janë shkelje të natyrës juridiko-penale, të sanksionueshme nga dispozitat materiale penale të Kodit Penal të Republikës së Kosovës”, tha Shefki Berisha.
Sipas tij, Komuna ka qenë e njoftuar për këto shkelje por që këto veprime janë bërë me dashje dhe në dijeni të plotë nga zyrtarët komunalë.
“AVONET ka informacione se për këto veprime dhe shkelje të rënda ligjore disa persona përgjegjës të Komunës së Ferizajt, po ndjeken penalisht nga organet e ndjekjes penale, ku disave tashmë ju janë konfirmuar aktakuzat, kurse ndaj disa të tjerëve po zhvillohet procedurë penale hetimore. Konkretisht, personave të cilëve ju është konfirmuar aktakuza po akuzohen për falsifikim të dokumenteve dhe keqpërdorim të detyrës zyrtare, ku procesi penal po zhvillohet pranë gjykatës kompetente, ndërsa personat tjerë zyrtarë po dyshohen për keqpërdorim të detyrës zyrtare, si rezultat i lëshimit të disa lejeve ndërtimore në mënyrë të kundërligjshme”, tha ai.
E nënkryetari i Komunës, Lulzim Aliu që ka qenë drejtor i Urbanizmit në periudhën e cekur, i mohon të gjitha shkeljet që mund të jenë bërë.
“Nuk mundet tash një vendim i Gjykatës pas 7 vitesh në mënyrë retroaktive me shqyrtu secilën leje të ndërtimit, leje të cilat kanë qenë të bazuara në një vendim të Kuvendit dhe ky vendim i Kuvendit nuk është i anulum. Anulimi përmes Gjykatës i një dokumenti para miratimit të PZHK-së, kjo nuk nënkupton anulimin e PZHK-së sepse ka prodhuar efekte juridike”, tha Aliu.
Madje, ai tregon se asnjë zyrtar komunal nuk është duke u hetuar mbi pretendime të tilla për keqpërdorim.
Në fund, ai u bëri thirrje qytetarëve që mos të shqetësohen për shkak se as lejet por as banesat e tyre nuk do të mirren pasi që janë ligjërisht në rregull.
