Nga Beogradi, erdhi për vizitë në kompleksin memorial “Adem Jashari” në Prekaz.
Vizita e avokatit serb Çedomir Stojkoviq e ka një qëllim, vendosjen e këtyre luleve para varrit të vajzës shtatë vjeçare të vrarë në Prekaz, Blerina Jasharit.
E përveç luleve, ai la edhe një mesazh.
Këtë e bëri pasi klienti i tij, politikani serb Nikola Sanduloviq, i cili vetëm pse bëri homazhe në këtë kompleks, u rrah dhe u arrestua nga autoritetet serbe.
Sipas Stojkoviq, nëse vendosja e luleve të paqes në varret e kombeve të tjera dënohet me burg nga Serbia, atëherë duhet të burgoset edhe ai.
“Nëse nuk ndodh kjo, atëherë vendi im do të duhet t’i shpjegojë tërë botës pse lulet e mia janë më ndryshe se lulet e Nikollës, apo lulet e kujtdo tjetër. Pse unë jam përjashtim dhe nuk do burgosem. Më burgosën apo jo, unë akoma do të jem njeri i lirë, sepse liria nuk vjen nga gjykimet. As burgu nuk vjen pas grilave. Liria vjen nga zemra e njeriut. Ne të cilët nuk kemi frikë, sepse njerëzit e mirë nuk kanë pse të frikësohen, ne me këto kemi shpjeguar gjithçka tonën. Nga të gjitha porositë që mund të dërgohen nga ky vend, kjo është më e rëndësishmja. Liria gjithmonë do të fitojë”, tha ai.
Pavarësisht që nesër do të udhëtoj drejt Beogradit, Stojkoviq thotë se nuk ndihet i frikësuar.
“Kam ardhur këtu pas 26 viteve, jo vetëm të shpreh pikëllim për qytetarët e vrarë, jo vetëm për të nderuar viktimat, por edhe që zyrtarisht të porosis, ne të cilët ndërtojmë ardhmëri më të mirë për popujt tanë, nuk frikësohemi. Nuk jemi frikësuar dje, nuk frikësohemi sot e as nuk do të frikësohemi nesër. Askush s’do të mund të na ndalojë neve, që të lëvizim nëpër rrugën e paqes, solidarizimit, dhe drejtësisë, tha avokati serb.
Më 2 janar, Sandulloviq e publikoi një video në rrjetin social X, ku ai shihej në kompleksin “Adem Jashari” në Prekaz duke vendosur kurorë me lule në monumentin që përkujton ngjarjet e 5, 6 dhe 7
Marsit 1998, kur forcat serbe vranë më shumë se 50 anëtarë të familjes së Adem Jasharit. Një ditë pas publikimit të videos ai u arrestua. Sandulloviq u mbajt në paraburgim nga 5 deri më 15 janar.
E pavarësisht lirimit, politikanit serb Nikola Sanduloviqit iu konfiskua pasaporta.