Avokati i Hashim Thaçit, Luka Mishetiq, ka thënë se gjashtë akuzat për krime kundër njerëzimit, duhet të rrëzohen, raporton teve1.info
Gjatë paraqitjes së dëshmisë së tij para trupit gjykues, Mishetiq tha se kur ka akuza të tilla, duhet të ketë sulm të organizuar ndaj civilëve. Sipas Misetiqit, Tribunali i Hagës e ka rrëzuar këtë pretendim në rastin e Fatmir Limajt.
“Gjashtë nga 10 pikat e Prokurorisë janë për krimet kundër njerëzimit. Për të vërtetuar këto pika, duhet të vërtetojë se ka pasur sulm të organizuar ndaj civilëve. Nëse nuk e vërtetojnë, këto gjashtë pika duhen rrëzuar dhe ju duhet të shfajësoni të akuzuarit për këto pika. Tribunali i Hagës në rastin Limaj konstatoi se nuk kishte sulme të zgjeruara ndaj civilëve. Konstatimi i fundit pranon se kishte kolaboracionistë me regjimin serb, diçka që Prokuroria dje nuk e pranoi”, tha Misetiq, raporton Nacionale.
Mishetiq foli edhe për komunikatat të cilat u përdorën dje nga Prokuroria.
“Nuk duhet të habiteni kur të dëgjoni se komunikatat janë diskutuar edhe më parë në Tribunal të tjerë që kanë rrëzuar përpjekjet e prokurorëve për t’i lidhur motivet kriminale me këto komunikata. UÇK-ja nuk kishte struktura komanduese për të kryer këto krime që pretendohet në komunikata. Këto u kryen nga elementë të këqij të UÇK-së”, deklaroi Luka Misetiq.
