Ish-presidenti i Kosovës, Hashim Thaçi nuk ka pasur motiv që të kryejë krime, për të cilat akuzohet. Kështu ka thënë avokati mbrojtës i Thaçit, Gregory Kehoe.
Kehoe gjatë seancës tha se Thaçi e ka ditur se suksesi i Ushtrisë Çlirimtare të Kosovës varej nga mbështetja ndërkombëtare sidomos nga ajo e ShBA-së, gjithashtu duke përmendur kushtin që ShBA i kishte vendosur ushtrisë, i cili thoshte që të mos sulmonin civilët.
“ZPS-ja dëshiron që ju të besoni se kishte një strukturë funksionale komanduese me kontroll efektiv. Kjo është shumë larg së vërtetës. Faktet e asaj që ndodhën në terren duam të vendosim në kontekst”, tha ai.
Tutje, avokati mbrojtës tha se Taçi e ka pranuar se janë kryer krime gjatë luftës nga disa individë, por hedhë poshtë akuzat e prokurorisë se këto krime janë kryer në bazë të një politike të udhëhequr nga UÇK.
Sipas avokatit të Thaçit, Serbia ka kryer krime në Kosovë që shpesh kanë pasur për bazë edhe hakmarrjen. /teve1.info/
