Bastisja në shtëpinë e ish-komandantit të Përgjithshëm të UÇK-së, Sylejman Selimit, u bë me urdhër të Gjykatës Speciale, pasi u mendua që mund të ketë pasur prova të cilat ndërlidhen me procedime penale për pengim të drejtësisë. Deklaroi kështu, avokati i ish-komandantit, Artan Qerkini.
Në një prononcim të shkurtër për media, Qerkini tha se fillimisht duhet theksuar që Selimi nuk e ka statusin e personit të dyshuar.
Njëherit, avokati konsideroi që urdhri për bastisje nga Gjykata, nuk është lëshuar në përputhje me dispozitat ligjore.
“Fillimisht vlen të theksohet se ai nuk e ka statusin e personit të dyshuar. Por, sipas urdhrit të Gjykatës, mendohet që në shtëpinë e tij mund të ketë pasur prova të cilat ndërlidhen me procedime penale për pengim të drejtësisë. Ne i kemi disa vërejtje në vetë urdhrin, mendojmë që nuk është lëshuar në përputhje me dispozitat ligjore, e për më shumë i cenon disa të drejta kushtetuese të personave, sepse s’mund të cenohet privatësia e një personi, pasi ai nuk e ka statusin e personit të dyshuar. Mirëpo, ne të gjitha këto çështje do t’i adresojmë në kohën dhe pranë institucioneve përkatëse të Dhomave të Specializuara”, deklaroi Qerkini.
Tutje, Qerkini tha se tani do t’i analizojnë të gjitha procedurat e zhvilluara dhe nëse arrijnë në përfundim që kjo bastisje ka pasur shkelje, atëherë do t’i përdorin të gjitha mjetet juridike./teve1.info/.