Institucioni i Avokatit të Popullit ka njoftuar se është duk zhvilluar hetimet për mungesën e ujit në fshatin Marec të Prishtinës.
Hetimi sipas tyre ka nisur në bazë të kompetencave ligjore që kanë.
“Për shkak të interesimit të opinionit publik dhe të mediave, Avokati i Popullit përmes kësaj komunikate njofton opinionin e gjërë se, në bazë të mandatit të derivuar nga Ligji nr. 05/L-019 për Avokatin e Popullit, është duke zhvilluar hetimet mbi bazën e ankesës së pranuar nga banorë të fshatit Marec, lidhur me mugesën e furnizimit me ujë të pijes në këtë fshat dhe mungesën e infrastrukturës për trajtimin e ujërave të zeza”, thuhet në komunikatë.
Ky institucion ka thënë se pas analizës së situatës dhe bazuar se e drejta për ujë të pijes është e drejtë e elementare u ka dërguar letër institucioneve përkatëse, Institutit Kombëtar të Shëndetit Publik të Kosovës, Komunës së Prishtinës dhe Kompanisë Rajonale “KRU Prishtina”.
“Sipas IKShPK-së, e njëjta përbrenda kompetencave të saja i ka rekomanduar Komunës së Prishtinës dhe KRU “Prishtina” që secila prej tyre, në kuadër të kompetencave dhe të përgjegjësive, të ndërmarrin masat e nevojshme për planifikimin e zgjidhjes afatgjate të furnizimit 24 orësh me ujë, për faktin se në këtë zonë 21 fshatra nuk kanë sistem të ujëfurnizimit. Komuna e Prishtinës, është zotuar se në bashkëpunim me KRU Prishtina dhe me institucionet tjera relevante ka filluar procedurat për trajtimin e çështjes dhe sigurimin e kyçjes në ujësjellës të fshatrave të Gollakut, me theks të veçantë sigurimin e kyçjes në rrjetin e ujësjellësit të të gjithë fshatrave të Komunës së Prishtinës, që akoma nuk kanë kyçje në rrjetin e ujësjellësit”, thuhet në përgjigjet e tyre ndaj Avokatit të Popullit që i ka publikuar vet ky institucion.
Avokati i Popullit, u ka bërë thirrje institucioneve kompetente relevante, “që brenda afateve të arsyeshme kohore, të ndërmarrin veprime në trajtimin e kësaj problematike, me qëllim të mbrojtjes së shëndetit të qytetarëve dhe mbrojtjes së mjedisit në fshatin Marec dhe jo vetëm”, thuhet në komunikatë.
Avokati i Popullit ka bërë të ditur se do të vazhdojë të monitorojë të përcjellë situatën dhe veprimin e institucioneve përgjegjëse, dhe se përbrenda kompetencave kushtetuese dhe ligjore do të vlerësojë ndërmarrjen e veprimeve të tjera në këtë drejtim.
