Prokuroria Themelore në Prishtinë ka njoftuar të enjten se ka zgjeruar hetimet edhe ndaj drejtorit të shkollës “Pavarësia” në Prishtinë, i cili u shfaq në një video duke goditur nxënësin e përfshirë më parë në rastin me një mësimdhënës.
Lidhur me këtë, avokati i drejtorit të shkollës “Pavarësia”, Rinor Bajrami, ka reaguar duke sqaruar se klienti i tij më 5 shkurt ka paraqitur kallëzim penal ndaj nxënësit A.O. për kanosje me vrasje, sharje dhe fyerje të rënda ndaj tij dhe familjes së tij.
Në një reagim për mediat, Bajrami ka theksuar:
“Si avokat i autorizuar i H.B (Drejtor i Shkollës “Pavarësia”), duke marrë parasysh përmasën që ka marrë kjo ngjarje në opinionin publik, e konsideroj të domosdoshme të paraqes disa sqarime thelbësore lidhur me ngjarjen e datës 9 shkurt 2026. Klienti im më 5 shkurt 2026 ka paraqitur kallëzim penal ndaj nxënësit A.O. për kanosje me vrasje, sharje dhe fyerje të rënda ndaj tij dhe familjes së tij. Pra, organet e rendit kanë qenë të njoftuara për situatën disa ditë para incidentit të publikuar. Më 9 shkurt 2026, ai është përballur sërish me sharje ndaj familjes së tij, me fyerje të rëndë të vajzës së tij 2 vjet e gjysmë dhe me kanosje të drejtpërdrejtë për jetën nga i njëjti person. Reagimi i tij ka ndodhur në ato rrethana konkrete, nën ndikimin e drejtpërdrejtë të kanosjes. Menjëherë pas momentit kritik, ai vetë ka ftuar policinë dhe ka raportuar ngjarjen. Për rrjedhojë, përgjegjësia penale e të mbrojturit tim duhet të analizohet në kontekstin e plotë faktik dhe juridik, e jo në mënyrë të shkëputur nga rrethanat që i kanë paraprirë dhe e kanë shoqëruar ngjarjen”.
Avokati ka shtuar se gjykimi publik i parakohshëm nuk ndihmon as së vërtetës e as drejtësisë, ndërsa vlerësimi përfundimtar i ngjarjes i takon organeve të drejtësisë.
Hetohet edhe drejtori i shkollës “Pavarësia” për dhunë ndaj nxënësit
