Trupi i pajetë i Faton Hajrizit i vrarë në Serbi më 19 korrik pritet që të arrijë në Kosovë gjatë mesnatës.
Këtë e ka bërë të ditur avokati i familjes Hajrizi, Gent Gjini në emisionin “Këndi i Debatit” në Tëvë1.
Ai ka thënë se Hajrizit do t’i bëhet obduksioni në Kosovë.
“Pritet që deri në mesnatë të sillet trupi i Faton Hajrizit. Posa të vjen trupi do të bëhet obduksioni në Kosovë”, ka thënë ai.
Ministria e Punëve të Jashtme të Kosovës ka njoftuar se Prokuroria e Qarkut të Beogradit ka dhënë leje për tërheqjen e trupit të pajetë të qytetarit të Kosovës, të raportuar si i vrarë në Lloznicë të Serbisë.
Ndërsa, edhe avokati Arianit Koci gjatë ditës e ka bërë të ditur se është bërë identifikimi i trupit në Lloznicë të Serbisë i cili i përket Faton Hajrizit.
Hajrizi ishte vrarë më 19 korrik nga Policia Serbe, pasi dy ditë më parë kishte vrarë një polic serb dhe një tjetër e kishte plagosur.
Ai sipas autoriteteve të Serbisë nuk kishte pranuar të dorëzohej. Hajrizi ishte arratisur nga burgu i Smrekonicës në Kosovë.
