Kandidati për deputet nga partia Guxo, njëherësh pjesë e listës së Lëvizjes Vetëvendosje, Haxhi Avdyli, në emisionin “Info Nata” në Tëvë1 ka kritikuar opozitën për mospërkrahjen e marrëveshjeve ndërkombëtare dhe për qasjen e tyre ndaj proceseve shtetërore.
Avdyli tha se opozita nuk ka qenë e obliguar të votojë për Qeverinë apo për figurat drejtuese të LVV-së, por ka pasur detyrë t’i përkrahë marrëveshjet me partnerët ndërkombëtarë.
“Unë jam krejt i pajtimit që opozita nuk e ka pas me detyrë me votu LVV-në, as Albinin, as Albulenën e Donikën. Por marrëveshjet ndërkombëtare me i votu i kanë pas obligim, sepse ato janë vota të domosdoshme. Edhe nëse nesër nuk është VV-ja në pushtet, edhe në të kaluarën kur nuk ka qenë në pushtet, shpesh herë i ka votu. Ato nuk kanë të bëjnë me politikën ditore; janë marrëveshje, janë grante, janë dhurata që na i jep Evropa e ne nuk i morëm,” deklaroi Avdyli.
Ai kritikoi opozitën edhe për mospërkrahjen e buxhetit, duke marrë shembull sjelljen e kryetarit të Prishtinës, Përparim Rama.
“Buxhetin, për të cilin ka derdhur lot krokodili Përparim Rama, që dilke në rrugë e thojke ‘qiti paret ministër’, e nuk shkojke me thënë një javë përpara: ‘shkoni votone buxhetin për Prishtinën’. A ia ka pas borxh qytetari i Prishtinës një kryetar që del aty e bën skena ‘qiti paret ministër’? Ku me i marrë ministri prej xhepit të vet? Edhe me i marrë në mënyrë të paligjshme? E mandej me gojën plotë,” u shpreh Avdyli.
