Haxhi Avdyli nga Partia Guxo e cilëson të dështuar totalisht Komisionin Qendror të Zgjedhjeve.
Madje, thotë se ky institucion bashkë me organet e drejtësisë po e legjitimojnë hajninë.
Këtë deklaratë, Avdyli e dha lidhur me procesin zgjedhor, pasi që Lëvizja Vetëvendosje (LVV) akuzoi Lidhjen Demokratike të Kosovës (LDK) për manipulim me votat e diasporës. Sipas LVV-së, rritja e papritur e votave të LDK-së në diasporë ishte artificiale, duke theksuar se në përfaqësitë diplomatike LDK mori vetëm 7.30% të votave, ndërsa me postë arriti në 30.55%.
“Edhe një institucion që ka dështuar është institucioni i quajtur KQZ. Ka dështuar totalisht KQZ-ja. PZAP-ja me të gjitha ato argumente, të cilat janë dhënë për keqpërdorime, për hajni, për mashtrim, i hedh poshtë të gjitha ato të argumentuara – të njëjtën gjë e bën edhe Gjykata me organet e drejtësisë, kjo nuk ka shpjegim përveç legjitimim i hajnisë”, tha ai në emisionin “Këndi i Debatit” në Tëvë1.
Ai tha se në të kaluarën e ka kritikuar ish-shefen e KQZ-së, Valdete Dakën, por që tashmë thotë se ka ardhur “një Kreshnik Radoniqi, i cili nuk dëgjohet fare”.
“Unë personalisht si deputet me katër mandate edhe në të kaluarën e kam kritikuar Valdete Dakën – ish-shefen e KQZ-së, por tash mendoj se na ka ardhur një shef që faktikisht Valdete Daka po na u duket shumë e mirë. Një Kreshnik Radoniqi, i cili nuk dëgjohet fare, të cilin nuk e kemi dëgjuar as duke dhënë një mendim rreth kësaj, apo një qëndrim rreth këtyre keqpërdorimeve”, tha ai.
Ai akuzoi KQZ-në dhe organet e drejtësisë se “po duan që t’ia vjedhin vullnetin qytetarëve”.
“Këta po duan që t’ia vjedhin vullnetin qytetarëve, që është më e thjeshta, çka i bëjnë buxhetit, paramendoni këto janë të argumentuara nga vetë ish-kolegët e mi nga LDK-ja, të cilët janë të zëshëm për të demaskuar këtë vjedhje dhe Prokuroria heshtë, ose ka nisur do hetime formale”, deklaroi Avdyli.
