Milot Avdyli do të ketë ndeshje të veçantë në plejofin e fazës nokaut të Ligës së Konferencës.
Avdyli është pjesë e Celjes sllovene, ndërsa të premten në shortin e tërhequr në Nyon të Zvicrës, u mësua se kjo skuadër do të luajë ndaj kampiones në fuqi të Kosovës.
23-vjeçari Avdyli, që në të kaluarën ka luajtur për grupmoshat e reja të Kosovës, iu bashkua Celjes në verën e vitit të kaluar nga Vorskla Poltava e Ukrainës.
Ai në stinorin vjeshtor ka luajtur rol të rëndësishëm duke regjistruar tetë asistime në 27 paraqitje.
“Kam dashur që të luajë ndaj Dritës në fazën e ligës, dhe tani ëndrra më është bërë realitet. Ndeshja do të jetë e veçantë për mua pasi do të luajë ndaj një klubi të shtetit tim. Kam disa gjëra të pazgjidhura me Dritën, pasi jam takuar me këtë skuadër dy herë sa isha pjesë e Trepçës dhe kam humbur dy herë”, ka thënë Avdyli duke qeshur, shkruan faqja zyrtare e Celjes të premten.
Avdyli është zhvilluar si futbollist te shkolla e futbollit Kurda, e më pas luajti te Trepça ’89. Nga Trepça ’89 kaloi tek Aarau në Zvicër, e më pas te Vorskla Poltava.
“Jam i sigurt se kësaj radhe do të jetë ndryshe. I njoh plot lojtarë të Dritës, ua kam përcjellë edhe ndeshjet evropiane dhe mund të them se ka kualitet në këtë skuadër, por padyshim se është skuadër që mund të mposhtet. Një atmosferë shumë e mirë na pret në Prishtinë, por mendoj se do të jemi në gjendje të adaptohemi. Është mirë për ne që luajmë në ndeshjen kthyese në stadiumin tonë, aty ku e kemi përkrahjen e zjarrtë. Para tyre kemi fituar ndaj AEK-ut të Athinës dhe Legias së Varshavës në fazën e ligës në Ligën e Konferencës dhe në përgjithësi nuk kemi pësuar humbje në shtëpi në këtë garë. Besoj se do të avancojmë tutje”, ka deklaruar Avdyli për faqen zyrtare të klubit slloven.
Celje është lider në kampionatin elitar të Sllovenisë “Prva liga”. Në pozitën e parë, Celje ka 43 pikë pas 18 ndeshjeve, 12 më shumë se Koperi dhe Maribori.
Ndeshja e parë mes Dritës dhe Celjes do të luhet në stadiumin “Fadil Vokrri” në Prishtinë më 19 shkurt.
Dueli kthyes zhvillohet një javë më pas në stadiumin “Z’dezhele”.
