Analisti politik, Tomor Avdija ka deklaruar se ekziston mundësia që zgjedhjet parlamentare të mbahen vitin e ardhshëm, por ai ka theksuar se një alternativë reale tani mund të jetë krijimi i një qeverie më të gjerë, që do të tejkalonte kuadrin e deritanishëm të shumicës me 61 vota në Kuvend.
Në emisionin “Info Nata” në Tëvë1, Avdija është shprehur se një marrëveshje politike më e madhe, që do të përfshinte edhe çështjen e zgjedhjes së presidentit, do të krijonte një qeveri gjithëpërfshirëse me më shumë fuqi veprimi dhe bashkëpunimi.
“Unë më shumë e shoh që zgjedhje mund të ketë vitin e ardhshëm, por unë e shoh një alternativë që mund të ketë një qeveri më të madhe sesa qeveritë e 61 numrave, dhe këtu të hyjë në marrëveshje edhe çështja e presidentit tani. Kjo do të nënkuptonte një qeveri të gjerë më të madhe. Dhe është mirë të kemi një koalicion të madh për arsye që të kemi fuqi veprimi, por edhe fuqi bashkëpunimi për të shtyrë përpara disa vendime të rëndësishme”, ka thënë Avdija.
Avdija ka theksuar gjithashtu se situata aktuale politike është mbajtur në një “status quo absurde”, pjesërisht për shkak të kohës së zgjedhjeve lokale.
Sipas tij, nëse këto zgjedhje do të ishin mbajtur më herët, vendi do të kishte marrë tashmë një përgjigje më të qartë nga klasa politike.
“Këtë lloj status quo-je absurde në veprimet dhe jetën politike në vend e kanë mbajtur zgjedhjet lokale. Nëse këto zgjedhje do të ishin mbajtur më herët, sot do të kishim një përgjigje më të qartë nga klasa politike”, ka vlerësuar ai./teve1.info/
