I ftuar në emisionin “Ditari” në tëvë1, ai thotë se shkak mund të jetë edhe lufta në Ukrainë pasi që ka ndikuar në rritjen e çmimeve.
“Këto të hyra janë të diversifikuara nga shumë burime por kryesisht buxheti i Kosovës ky fondi që akumulohet pastaj planifikohet ka bazën në transaksionet ekonomike që tatohen, taksohen në formë TVSH dhe në formë të taksave tjera të importit. Një rol tjetër luajnë edhe format tjera të financimit qoftë përmes huamarrjeve, qoftë instrumenteve tjera që i përdor shtetim institucionet për të rritur buxhetin e vendit”, tha ai.
Sipas tij, në momentin kur ka inflacion të lartë atëherë edhe të hyrat e Qeverisë rriten për shkak të tatimit më të madh.
“Nëse e shohim planifikimin buxhetor për inkasimin, të hyrat për këtë vit e shohim se janë tejkaluar projeksionet për shkak të nivelit të lartë të inflacionit që nuk është parashikuar. Pra lufta në Ukrainë nuk është paralajmëruar se do të sjellë një kaos të tillë ekonomik në mbarë globin ka reflektuar në rritjen e çmimeve që po diskutohen çështjet e krizës dhe përballimit dhe në rritjen e çmimeve është rritur edhe inkasimi i të hyrave qeveritare pra në taksat përkatëse”, shtoi ai.
Po ashtu, Avdiaj përmend edhe keqmenaxhimin e financave publike si një arsye e rritjes së buxhetit për vitin e ardhshëm.
Ai thotë se gjatë këtij viti ka pasur mungesë të investimeve kapitale, gjë që siç thotë ai, e ka bllokuar paranë e gatshme në xhirollogarinë e vendit.
“Mund të themi se arsye tjetër është keqmenaxhimi i financave publike në kuptimin e investimeve kapitale. Kemi pasur rast, debatet e shumta kur në muajin gusht dolën statistika nga vetë institucionet se ka pasur rreth 12 për qind realizueshmëri plani i investimeve kapitale. Kjo e ka bllokuar paranë e gatshme në xhirollogarinë e vendit. Këto do të ridestinohen qoftë në fazën kalimtare qoftë do t’i alokohen linjat tjera buxhetore eventualisht të shtyhen për ekzekutim për vitin vijues pra një mungesë e realizimit të investimeve kapitale nënkupton që paraja do të mbahet për vitin e ardhshëm”, tha ai./teve1.info/
