Ish-diplomati, Tomorr Avdia, deklaron se LVV-ja ka pësuar humbje nga zgjedhjet e 9 shkurtit.
Avdia thotë se LVV-ja është partia që ka pësuar rënien më të madhe.
“100 mijë vota më pak janë vota që LVV-ja zgjedhjet e kaluara i ka marrë nga LDK-ja, janë 100 mijë vota që Vjosa Osmani i ka dërguar në VV. Këto janë 100 mijë vota diference, ka edhe tjerë të pakënaqur, por që edhe gjuha e Kurtit që ka qenë gjatë fushatës. Ndërkohë, LDK-ja është ajo që është rritur për 50 mijë vota – për 6%. Në këtë lloj veprimi politik duket që partia që ka pësuar rënien më të madhe është te LVV-ja. Sepse, është 10 për qind më pak se zgjedhjet e kaluara”, tha ai në emisionin “Këndi i Debatit” në Tëvë1.
Ndërkohë, tha se 10 për qindëshi që i mungon VV-së, është te rritja e LDK-së, pasi ka pasur reforma brenda atij subjekti politik.
“Analiza është e saktë, sepse kanë 10 për qind më pak. Kjo është matematika ime. LDK-ja ka pasur një rritje të mjaftueshme, e cila ka ndërtuar një frymë… VV-ja ka pësuar humbje në elektoratin e saj – 10 për qind nuk është pak. Ka kërkuar 500 mijë vota e më shumë se 50 për qind dhe këtë objektiv nuk e ka kapur Kurti dhe partia e tij”, deklaroi ai.
Më 9 shkurt rreth 40.59 për qind e mbi 1.9 milion qytetarë me të drejtë vote votuan në Kosovë, pa llogaritur votat nga jashtë dhe me kusht.
Lëvizja Vetëvendosje fitoi 40.83 për qind e votave, Partia Demokratike e Kosovës (22.15%), Lidhja Demokratike e Kosovës (17.59%), Koalicioni Aleanca për Ardhmërinë e Kosovës dhe Nisma (7.47%), dhe Lista Serbe (4.43%)./teve1.info/
