Avdi Hoti është zgjedhur kryetar i Sindikatës së Policisë së Kosovës, të shtunën në Kuvendin e V-të Zgjedhor të kësaj sindikate.
Në komunikatë thuhet se Hoti ka marrë shumicën e votave për këtë post, ndërsa nënkryetare është zgjedhur Edita Azemi.
Kryetari i Bashkimit të Sindikatave të Pavarura (BSPK-së), Atdhe Hykolli në fjalën e tij të rastit thuhet se ka theksuar rolin thelbësor të sindikatës në fuqizimin e pozitës së pjesëtarëve të Policisë, në avancimin e të drejtave të tyre, si dhe në ndërtimin e një ambienti profesional, dinjitoz dhe të sigurt për të gjithë.
Ndërkaq, kryetari i zgjedhur Avdi Hoti duke i falenderuar delegatët dhe të pranishmit ka thënë se ky Kuvend është dëshmi e demokracisë së brendshme sindikale dhe e përkushtimit për të avancuar të drejtat dhe mirëqenien e punonjësve të Policisë së Kosovës.
“Përmes këtij forumi ne jo vetëm që reflektojmë mbi arritjet dhe sfidat, por gjithashtu nderojmë rrugën për të ardhmen – një të ardhme të sigurt, më të drejtë dhe më të denjë për të gjithë pjesëtarët e Policisë së Kosovës. Jemi të vetëdijshëm për sfidat me të cilat përballet policia jonë, qoftë në aspektin e punës, ashtu edhe në atë social-ekonomik, por jemi po aq të vendosur që përmes organizimit dhe zërit sindikal t’i realizojmë të gjitha kërkesat e punonjësve të Policisë së Kosovës”, është shprehur ai.
Kuvendi sipas njoftimit i ka përmbyllur punimet në një atmosferë uniteti, përgjegjësie dhe bashkëpunimi, duke u uruar organeve të reja drejtuese punë të mbarë, vendosmëri dhe suksese të vazhdueshme në misionin fisnik të përfaqësimit dhe mbrojtjes së dinjitetit të Policisë së Kosovës.
