Ky është mishi që u konfiskua të martën në mbrëmje nga zyrtarët e Policisë së Kosovës.
38 mijë kilogramë mish u gjetën të prishur. Një pjesë e mishit të konfiskuar ishte me afat të skaduar e pjesa tjetër ishte i dëmtuar.
Mishi është gjetur në fshatin Zahaq të Pejës.
E Policia e Kosovës ka arrestuar dy persona për këtë çështje.
Menaxheri kryesor i pesë njësive të biznesit afarist dhe zëvendës menaxheri i depos janë shoqëruar në Polici.
E pas intervistës me urdhër të prokurorit kujdestar i dyshuar A.H., është ndaluar për 48 ore ndërsa i dyshuari A.A., është lëshuar në procedurë të rregullt.
Mbi të arrestuarit rëndon dyshimi se kanë kryer veprën penale: ‘prodhimi dhe vënia në qarkullim e artikujve te dëmshëm ushqimor’.
Ndërsa inspektorati ka vendosur që kjo sasi e mishit të asgjësohet, e të përfundojë në deponinë e mbeturinave regjionale në Pejë.
Një konfiskim i tillë ishte bërë edhe vitin e kaluar ku ishin konfiskuar afër 700 mijë kilogram mish.
Raporti i gazetares Valëza Sylejmani.
