Agjencia e Ushqimit dhe Veterinarisë (AUV) njofton se ka kryer kontrolle të rregullta në të gjitha ngarkesat e importuara me mish dhe produkte mishi pule me origjinë nga Brazili. Sipas të dhënave, të gjitha ngarkesat janë në përputhje me rregullat ligjore dhe nuk janë gjetur probleme gjatë inspektimeve.
Këto kontrolle janë bërë pas publikimit të incidentit të mishit të dyshuar nga Brazil në Shqipëri.
Zëdhënësi i Agjencisë së Ushqimit dhe Veterinarisë në Kosovë, Lamir Thaçi, thotë se janë ndërmarrë veprime shtesë pas skandalit në Shqipëri, mes tjerash edhe ndalimi i ngarkesave.
“Si masë preventive, AUV ka urdhëruar një kontroll të detajuar të ngarkesave të mishit të pulës nga Brazili. Deri tani, janë mostruar dhe ndaluar përkohësisht 7 ngarkesa, që janë duke pritur rezultatet e testimeve laboratorike. AUV gjithashtu ka inspektuar disa pika shitëse, nga të cilat janë marrë mostra për testim”, deklaron ai.
Thaçi thekson se deri më tani nuk ka asnjë fakt që tregon lidhje me incidentin në Shqipëri.
“Në aspektin hulumtues sipas të dhënave nga kontrolli kufitar, të konfirmuar nga Autoriteti Kombëtar i Ushqimit në Shqipëri. Nuk është gjetur asnjë fakt që ndërlidhë incidentin në Shqipëri me produktet qe tregtohen në Kosovë”, deklaron Thaçi për rtk.
Ai tutje njofton se nuk ka pasur asnjë ankesë nga konsumatorët në lidhje me mundësinë e helmimit nga mish i pulës, dhe as nuk janë raportuar raste të shfaqjes së shenjave të helmimit nga ushqimi.
“AUV do të vazhdojë monitorimin e situatës dhe, sipas rezultateve laboratorike, do të ndërmarrë masa të tjera nëse është e nevojshme. Agjencia thekson se çdo rezultat i analizave laboratorike do të komunikohet me publikun menjëherë, duke garantuar transparencë dhe siguri për konsumatorët kosovarë”, thekson mes tjerash ai.
