Agjencia e Ushqimit dhe Veterinarisë (AUV) ka bërë të ditur se kafja e bluar me origjinë nga Kosova, e cila eksportohet edhe në Kroaci, është e sigurt për përdorim. Ky konfirmim vjen pas dyshimeve të ngritura për përmbajtje të lartë të akrilamidës, një substancë kimike potencialisht e dëmshme.
Sipas AUV-së, analizat laboratorike kanë treguar se niveli i akrilamidës në të gjitha mostrat e testuara është nën kufirin maksimal të lejuar nga standardet e sigurisë ushqimore.
Në kuadër të Planit Vjetor të Inspektimit dhe bazuar në parimin e vlerësimit të rrezikut, AUV ka realizuar kontrolle dhe analiza për të gjitha brendet e kafesë që prodhohen për tregun vendor dhe për eksport. Bazuar në rezultatet e këtyre analizave, operatorët e bizneseve ushqimore lejohen të vazhdojnë pa pengesa tregtimin e kafesë brenda dhe jashtë vendit.
