Agjencia e Ushqimit dhe Veterinarisë (AUV) ka bërë të ditur se ka ndaluar një sasi prej 462 copë formulë ushqimore “Nestle” për fëmijë me origjinë nga Holanda, e cila ishte futur në tregun e Kosovës përmes marketeve “Rossman Kosova”, pasi ishte importuar nga kjo kompani në Shqipëri.
Bllokimi i produktit është bërë për shkak të identifikimit të substancës “Cereulide” në këto produkte ushqimore për fëmijë.
Në njoftimin e shpërndarë për media, AUV sqaron se vendimi është marrë mbi bazën e informacionit të pranuar nga Republika e Shqipërisë, konkretisht nga Autoriteti Kombëtar i Ushqimit, i cili ishte njoftuar përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF) lidhur me praninë e kësaj substance në formulën ushqimore me origjinë nga Holanda.
Sipas AUV-së, “është konstatuar se subjekti ‘Rossmann & LALA SH.P.K.’ në Shqipëri ka eksportuar 462 copë të këtij produkti në Republikën e Kosovës për kompaninë ‘Rossmann Kosova’”.
Agjencia thekson se, në bashkëpunim me kompaninë përkatëse, është realizuar bllokimi i menjëhershëm i produktit dhe se në ditët në vijim do të nisë procesi i asgjësimit, në përputhje me legjislacionin në fuqi.
AUV gjithashtu thekson se, pavarësisht mungesës së inspektorëve me të cilën po përballet, mbetet e përkushtuar në monitorimin e vazhdueshëm të tregut dhe të zinxhirit ushqimor, me synim që konsumatorëve në Kosovë t’u garantohet ushqim i sigurt dhe i shëndetshëm.
Nestlé’, kompania më e madhe në botë e mallrave të konsumit ka vendosur të tërheqë nga tregu shqiptar qumështin formulë dhe disa produkte të tjera për fëmijët. Lajmi është dhënë nga marketet “Rossman & Lala”, ku është afishuar një njoftim për klientët dhe prindërit.
Në njoftim thuhet se produktet e qumështit formulë dyshohet se mund të kenë prani të mikroorganizmit Bacillus cereu. Bacillus cereus është një bakter gram-pozitiv, në formë shufre, aerob ose anaerob fakultativ, që formon spore, dhe gjendet gjerësisht në natyrë, veçanërisht në tokë, pluhur dhe bimësi. Është një shkaktar i zakonshëm i helmimit ushqimor tek njerëzit, për shkak të aftësisë së tij për të prodhuar toksina. Simptomat e para janë të vjella dhe diare. Prindërve që kanë blerë produkte të prekura të BEBA-s u kërkohet gjithashtu për arsye sigurie të ndalojnë për momentin së ushqyeri fëmijët e tyre.
Nuk ka raportime të konfirmuara për efekte që lidhen me konsumin e produkteve të prekura. Megjithatë, si masë paraprake, prodhuesi Nestle ka vendosur të zbatojë tërheqjen e këtij produkti në përputhje me standardet strikte të cilësisë dhe sigurisë që kompania Nestle zbaton. Prindërve që kanë blerë produkte të prekura të BEBA-s u kërkohet gjithashtu për arsye sigurie të ndalojnë për momentin së ushqyeri fëmijët e tyre me to dhe mund ti kthejnë këto produkte në dyqanin ku i kanë blerë, Çmimi i blerjes do të rimbursohet edhe pa faturë.
