Policia malazeze dhe Prokuroria në Rozhajë janë duke hetuar dy incidente në kufirin mes Malit të Zi dhe Kosovës ku u dëmtuan objektet e qendrës së skijimit Hajlla-Shtedim nga të shtëna me armë zjarri, raporton Radio Evropa e Lirë.
Njëri incident kishte ngjarë në korrik të vitit të kaluar e tjetri më 24 gusht të këtij viti, ku në të dyja rastet, Policia dhe Prokuroria dyshojnë se të shtënat janë kryer nga territori i Kosovës.
Këtë gjë e ka konfirmuar për Radion Evropa e Lirë kryeprokurori i Prokurorisë Themelore në Rozhajë, Aldin Kallaç.
Qendra e skijimit në ndërtim, e vendosur pranë kufirit kosovaro-malazez në territorin e Rozhajës, po ruhet nga Policia që nga korriku, pas një incidenti ku në objektin e teleferikut u zbuluan vrima plumbash.
Prokuroria e Rozhajës kishte hapur një rast lidhur me këtë ngjarje në fund të gushtit 2024, pas zbulimit të dëmtimeve të reja në teleferik.
Prokuroria i ka kërkuar Policisë të mbledhë prova shtesë, me qëllim nisjen e një hetimi të ri për incidentin e fundit.
“Drejt fundit të gushtit janë vërejtur tri dëmtime në kabinën e qendrës së skijimit nga armë zjarri. Policia ka ndërmarrë veprime për t’i zbuluar autorët, por rrethanë rënduese mbetet fakti se veprimi është kryer nga territori i Republikës së Kosovës”, ka thënë Kallaç.
“Përmes institucioneve ndërkombëtare, Policisë së Kosovës i janë dërguar kërkesa për bashkëpunim dhe identifikimin e autorëve. Por, deri tani nuk kemi marrë përgjigje. Pas mbledhjes së të gjitha informacioneve do të hapet rast i plotë”, vijoi Kallaç.
Në anën tjetër, Fadil Gashi nga Policia e Kosovës për rajonin e Pejës i tha REL-it se nuk ka asnjë informacion për incidente të sigurisë në kufirin me Malin e Zi.
Ai shtoi se policia rajonale është më shumë e angazhuar “për ruajtjen e rendit dhe qetësisë publike”, e jo për incidente ndërkombëtare.
Ndërsa Gazmend Muhaxhiri, ka thënë për këtë medium se mban kontakte me autoritetet lokale në Rozhajë, konkretisht me kryetarin Rahman Husoviq, por se nuk është informuar nga askush për këto dyshime apo për incidentet e ndodhura.
“Tani po e dëgjoj nga ju. Askush nuk më ka kontaktuar, askush nuk ka raportuar asgjë. Kryetarin e Rozhajës e kam parë për herë të fundit në qershor, por nuk kam marrë asnjë ankesë”.
“Para shtatë-tetë ditësh kam qenë në Plavë, mund të më thoshin diçka, por askush nuk më ka thënë asgjë”.
