Targat po ua konfiskojnë. Madje edhe dënime të larta po u shqiptojnë.
Janë këta, autobusët e linjës Podujevë- Prishtinë që këtë të hënë përsëri u gjobiten.
Kjo meqë, paralajmërimi i Shoqatës së Transportit të Podujevës që të nisen nga “Xhamia e Llapit” në Prishtinë, bëri Policinë e Kosovës dhe Inspeksionin e Komunë të ndërhyjë.
E detaje për këtë nismë dha drejtuesi i kësaj shoqate, Beqir Mustafa.
“Ne i kemi lajmëruar edhe me shkrim që sot do të vijmë në rrugën tek ‘Bahollët’ e te ‘Xhamia e Llapit’, këta na ndërprenë këtu nuk na lanë më shku të stacionin te ‘Xhamia e Llapit’, na i morën tabelat, na e dhanë tiketën 500 euro dhe na kanë bllokuar këtu njëherë vullnetarisht. I kanë bllokuar nuk i kanë lënë me hi hiç, krejt në Podujeve janë shkuar”, tha ai.
Sipas Musatafës, këta kanë të drejtë të ndalën tek “Xhamia e Llapit”, por se Komuna po ua pamundëson një gjë të tillë.
“Na rendin e udhëtimit e kemi prej Ministrisë deri në muajin shkurt të viti 2026, dhe Komuna na ka heq na kanë vendos ka rruga “Zagrebi”, atje është një shkollë ka nxënës, nuk ka vend për pritje nuk ka stacion, vijnë gratë me fëmijë me karroca nuk kanë ku të presin. E mësimi fillon me të parin, na e kemi paraparë me u kthy ka kemi qenë më herët”, shtoi ai.
I pakënaqur me situatën është edhe pronari i njërit nga autobusët, i cili thotë se kërkesa e tyre nuk u mor parasysh as nga Ministria e Mjedisit, Planifikimit Hapësinor dhe Infrastrukturës.
“Zyrtarëve të Ministrisë 10 herë i kemi bërë kërkesa me dal me i ndalë autobusët 12 dhe 13, se ata nuk kanë orar me kaluar andej se kalojnë në territor të Komunës së Podujevës se në magjistrale Podujevë- Prishtinë nuk mundet me hi, duhet me shkuar për Siqevë, Sharbanë edhe nuk ndërmerr Ministria”, shprehet ai.
E nga Komuna janë shprehur të prerë që kërkesa e Shoqatës së Transportit të Podujevës nuk është e realizueshme.
“Kemi vendos që përfundimisht kthimi nga “ Xhamia e Llapit”, nuk mund të behët sepse kësisoj ne e hapim një derë të re qe edhe qytetet e tjera të kërkojnë që të kenë qasje në qytet. Podujeva si qytetet edhe në kuptimin si Shoqatë e ka pasur një privilegj të tillë e fakti që askush nuk është marr me një situatë të tillë është keqkuptuar nga ana e tyre se gjithmonë do të ketë një kalim të tillë”, tha ai.
Lushaku, madje tregoi se në ndërkohë që ata po bëjnë grevë, janë duke punuar që disa nga kërkesat e tyre të plotësohen, siç është largimi i taksive ilegale dhe rishikimin edhe një herë të stacioneve të operatoreve të Komunës së Prishtinës në atë zonë.
