Austria dhe Turqia, do të takohen në ndeshjen e fundit të 1/8 së finales në “Euro 2024”.
Kjo përballje luhet sonte prej orës 21:00 në stadiumin “Red Bull Arena” të Leipzigut. Austria ka treguar paraqitje të mira në fazën e grupeve dhe po synon ta eliminoj Turqinë në 1/8 e finales për të avancuar për herë të parë në çerekfinale të Evropianit.
Megjithatë, Austria nuk do ta ketë aspak të lehtë këtë mision për shkak se përball ka Turqinë tejet të papërshtatshme.
Austriakët ishin fantastikë në fazën e grupeve duke përfunduar para Francës dhe Holandës. Në fakt, Austria përfundoi e para në Grupin D me 6 pikë, një më shumë se Franca dhe dy më shumë se Holanda, të cilat gjithashtu avancuan nga faza e grupeve.
Edhe Turqia i kishte dy fitore në Grupin F dhe me gjashtë pikë të mbledhura përfundoi e dyta për t’u kualifikuar në fazën nokaut.
Turqia do të ketë mungesa të rëndësishme në këtë përballje pasi për shkak të suspendimit do të mungojnë mesfushori Hakan Calhanoglu dhe mbrojtësi Samet Akaydin. Në anën tjetër, Austria do të jetë pa mbrojtësin Patrick Wimmer por e motivuar maksimalisht për ta eliminuar Turqinë.
Në ndeshjen miqësore të luajtur në mars të këtij viti në Vjenë, Austria triumfoi 6:1 ndaj Turqisë.
Ndërkohë, prej orës 18:00 nis dueli ndërmjet Rumanisë dhe Holandës që po luhet në stadiumin “Allianz Arena” të Munchenit.
Me këto dy ndeshje edhe do të mbyllet faza e 1/8 së finales, ku fituesit e ditës së sotme do të përballen me njëri tjetrin në çerekfinale të Evropianit.
