Administrata Tatimore e Kosovës (ATK) shënon 26-vjetorin e themelimit, duke theksuar kontributin vendimtar të institucionit për stabilitetin fiskal dhe zhvillimin ekonomik të vendit, raporton KosovaPress.
Në një konferencë për media, zëvendësministër i Financave, Punës dhe Transfereve, Agon Dobruna e konsideroi ATK-në institucion themelor për funksionimin e shtetit dhe për kthimin e sovranitetit fiskal të Republikës së Kosovës.
“Shënojmë 26-vjetorin e ATK-së, një institucion themelor për funksionimin e shtetit dhe për kthimin e sovranitetit fiskal të Republikës së Kosovës. ATK është ndërtuar paralelisht me shtetin tonë, nga një administratë e krijuar në rrethana të vështira, në një institucion model profesional dhe të besueshëm. Kontributi i saj ka qenë vendimtar për stabilitetin fiskal, ndërtimin e institucioneve dhe zhvillimin ekonomik të vendit. Si Qeveri e Republikës së Kosovës e konsiderojmë ATK-në një shtyllë kyçe të qeverisjes së mirë dhe drejtësisë fiskale. Të hyrat e mbledhura nuk janë thjesht shifra buxhetore, mirëpo janë mjete për arsim, shëndetësi, zhvillim social, ekonomik dhe përmirësim të jetës së qytetarëve”, ka thënë ai.
Drejtori i Përgjithshëm i ATK-së, Mentor Hyseni, foli për procesin e modernizimit dhe digjitalizimit të administratës tatimore, duke theksuar një qasje më shumë këshilluese sesa ndëshkuese ndaj tatimpaguesve.
“Fillimisht duhet të njoftoj me një qasje të re që kemi filluar që ta modernizojmë ATK. Kryesisht me qasjen tonë më pak ndëshkime me shumë këshilla. Asnjëherë nuk është e lehtë që të implementohet ligji nëse nuk ka vullnet te tatimpaguesi… Si faktor i dytë është procesi i digjitalizimit që po mundohemi të bëjmë si proces. Asnjë reformë fiskale ose digjitale nuk mund të bëhet pa një pjesë të resurseve njerëzore të kualifikuara. Ideja e dytë ka të bëjë me një reformë që po mundohemi të bëjmë për burimet njerëzore që do të rekrutojmë një numër të madh të stafit të ri, ndërsa pjesa e stafit të vjetër do të ketë mundësinë ideale për të përqëndruar procesin e monitorimit, dijen dhe vullnetin e tyre të punës për të rinjtë që do t’i bashkohen ATK”, tha ai.
Eksperti i tatimeve, Shyqyri Bytyqi, rikujtoi fillimet e vështira të ATK-së në vitin 2000, kur mungonin ligjet dhe procedurat bazë, duke theksuar vullnetin dhe përgjegjësinë morale të gjeneratës së parë për të ndërtuar besimin dhe shtetin fiskal të Kosovës.
“Ishte goxha kohë e vështirë pasi mungonte gjithçka duke filluar nga ajo që ishte kryesorja, që ligjet nuk ishin të zhvilluara, mungonin procedurat, madje nuk kishim edhe ndonjë zyrë që ishim gjithë aty bashkë. Por kishim dicka të veçantë, kishim vullnetin, për të ndërtuar shtetin, procedura, kishim vullnet të krijojmë besim. Pra, si gjeneratë ishte një barrë kogja e rëndë në supet tona. Po flasim për vitin 2000, kur ne pritnim që të fillojmë si inspektorë të parë do dilnim në terren, kur Kosova si shtet për herë të parë do të fillonte të mblidhte tatimet e veta. Ishte një mision, përgjegjësi morale”, ka thënë ai.
