Administrata Tatimore e Kosovës ka regjistruar 60 milionë Euro më shumë gjatë periudhës janar-maj të këtij viti, krahasuar me vitin paraprak, raporton teve1.info
Sipas komunikatës së ATK-së, kjo është realizuar nga përmirësimi i mbledhjes se të hyrave dhe zvogëlimi i hendekut tatimor.
Po ashtu, sipas komunikatës së ATK-së, ky përmirësim i të hyrave ka të bëjë edhe me zvogëlimin e humbjeve nga evazioni fiskal.
“Pikërisht në kuadër të kësaj, plani i të hyrave fokusohet në qëllimet strategjike si: përmirësimi i mbledhjes se te hyrave dhe zvogëlimi i hendekut tatimor për t’a kuptuar shkallën e mos përmbushjes dhe për t’i përcaktuar strategjitë prioritare për të adresuar humbjen e të hyrave nga evazioni fiskal. Po ashtu, forcimi i përmbushjes vullnetare në të gjitha segmentet e tatimpaguesve vazhdon të mbetet prioritet kryesor, duke u siguruar që tatimpaguesit paguajnë shumën e saktë tatimore, dhe të ndërmerren veprimet e duhura ndaj tatimpaguesve mos – përmbushës.
Të gjithë këta indikator kanë rezultuar që dhe për periudhën janar – maj të këtij viti të realizojmë, por edhe të tejkalojmë pritshmeritë, ku të hyrat e grumbulluara janë 372.7 milion euro, ku nëse i krahasojmë me periudhën e njëjtë të vitit 2022, kemi rritje mbi 60 milionë euro më shumë apo 19.2%”, thuhet në komunikatë.
