Atdhe Hetemi është emëruar drejtor ekzekutiv i Institutit për krimet e kryera gjatë luftës në Kosovë.
Kështu bëri të ditur kryeminstri Albin Kurti gjatë mbledhjes së Qeverisë, përcjell teve1.info
“Vazhdon angazhimi ynë institucional për të gjitha krimet e kryera gjatë luftës, angazhimi ynë për të matur dëmet e shkaktuara, andaj sot u bë edhe një hap në këtë drejtim për institucionalizimin, mbrojtjen, ruajtjen e kujtesës kolektive e cila do të na shërbejë edhe neve edhe brezave pas nesh. Po e jetësojmë Institutin që do të adresojë krimet e Serbisë në luftën e viteve 1998-1999, andaj sot emërova Atdhe Hetemi drejtor ekzekutiv i Institutit për krimet e kryera gjatë luftës në Kosovë, që do t’i prijë këtij procesi të rëndësishëm”, deklaroi Kurti.
Tutje, kreu i Ekzekutivit njoftoi edhe për vendimet që kanë marrë për rritjen e kapaciteteve për procesin e trajtimit të krimeve të luftës.
“Për të rritur kapacitetet për të trajtuar krimet e luftës kemi shtuar buxhetin për pozita të reja në Këshillin Prokurorial të Kosovës dhe në Këshillin Gjyqësor të Kosovës. Ndërkaq në Policinë e Kosovës nga një sektor kemi ngritur Drejtorinë e Hetimit të krimeve të luftës dhe kemi dyfishuar numrin e hetuesve të krimeve të luftës”, potencoi ai.
Kurti shtoi se kriminelët e luftës duhet të dalin para drejtësisë dhe “Serbia duhet mbajtur përgjegjëse për krimet e kryera në Kosovë”. /Teve1.info/
