Skuadra nga Serie A, Atalanta ka shokuar Liverpoolin në ndeshjen e parë çerekfinale të Ligës së Evropës.
Në duelin e luajtur të enjten mbrëma në “Anfield Road”, Atalanta triumfoi me rezultatin 3:0 për të siguruar një fitore të rëndësishme për duelin e kthimit pas një jave në Itali.
Gianluca Scamacca (38’, 61’) e Mario Pasalic (83’) shënuan golat për fitoren bindëse të Atalantas. Fitore në ndeshjen e parë çerekfinale ka shënuar edhe Roma, e cila e mposhti 1:0 Milanin në “San Siro” me golin e realizuar nga Gianluca Mancini (17’).
Fitore por me rezultatin 2:0 ka shënuar edhe Bayer Leverkuseni që triumfoi ndaj West Ham Unitedit, falë golave Jonas Hofmann (83’) dhe Victor Boniface (90’). Tek Leverkuseni, mesfushori Granit Xhaka ishte i pazëvendësueshëm.
Ndërkohë, dueli tjetër, ai mes Benficas dhe Marseillet u mbyll me fitoren e ekipit portugez 2;1. Rafa Silva (16’) dhe Angel Di Maria (52’) shënuan golat për Benfican, ndërsa për Marseillen realizoi Pierre-Emerick Aubameyang (67’).
