Mbi 200 mijë euro para të gatshme dhe stoli ari të cilat i takonin Teqes së Madhe në Gjakovë janë vjedhur të hënën.
Ani se nuk pranuan të flasin para kamerave për ekipin e Tëvë1, përmes një reagimi publik, Teqja e Madhe në Gjakovë, po e quan akt vandal vjedhjen brenda objektit.
”Teqja e Madhe e Gjakovës përcjellë indinjatën e thellë për aktin vandal e makabër të grabitjes në Teqe. Shuma e parave dhe gjërave tjera me vlerë, e grabitur në Teqe, ka qenë pjesë e kursimeve disavjeçare të Shehut të Teqës së Madhe, familjes Shehu dhe të gjithë besimtarëve, me qëllim të investimit në rindërtimin përfundimtar të objektit të Teqesë së Madhe në Marash – Hisar të Prizrenit”, thuhet në reagim.
Detaje nga vjedhja e rëndë dhanë edhe nga Policia e Kosovës.
Deri në mesditën e së martës nuk pati asnjë të dyshuar për këtë rast, por hetimet për zbardhjen e rastit po vazhdojnë.
Jo zyrtarisht Tëvë1 merr vesh se vjedhja kishte ndodhur pa dëmtim të pronës së Teqes.
Hajnat dyshohet se nuk përdorën forcë për hapjen e dhomës në të cilën gjendeshin paratë dhe stolitë e vjedhura.
