Mesfushorët e Kombëtares së Shqipërisë, Kristjan Asllani e Nedim Bajrami ishin të pranishëm në konferencën e së martës për të folur për duelet e këtij muaji.
Shqipëria do të përballet me Anglinë dhe Andorrën në kuadër të kualifikimeve për Kampionatin Botëror 2026.
Shqipëria, të hënën ka nisur grumbullimin kurse Asllani theksoi se po përgatiten mirë dhe do të japin maksimumin për të marrë rezultate të mira në të dyja ndeshjet.
Megjithatë, mesfushori i Interit, Asllani ka pranuar se fokusi i Shqipërisë tani për tani është te ndeshja me Anglinë, e cila do të luhet të premten mbrëma në Londër.
“Janë skuadër shumë e fortë, janë një ekip fizik. Kanë lojtarë shumë teknik dhe i njohim shumë mirë. Besoj se nuk duhet të mendojmë shumë, por të luajmë me shpirt e zemër. Të mos shkojmë atje si turist se gjithmonë kur të hyjmë në fushë të hyjmë për fitore. E dimë që është e vështirë, por do të punojmë edhe këto 2-3 ditë për të bërë mirë”, ka thënë Asllani.
Ndërkohë, Bajrami që po bën karrierë te Rangersi në Skoci, ka insistuar se Kombëtarja e Shqipërisë mund ta përballoj Anglinë, që vlerësohet favorite.
Bajrami ka thënë se me rikthimin e sulmuesit Armando Broja, Shqipëria është e kompletuar dhe gati për një ndeshje të tillë.
“Anglia luan shumë fort, por të gjithë çunat janë gati. Me rikthimin e Brojhës jemi më shumë se kurrë gati. Ne e dimë se çfarë kundërshtari është Anglia dhe trajneri e di mirë gjithashtu, kështu që do të përgatitemi sa më mirë”, është shprehur Bajrami.
Tri ditë pas ndeshjes në “Wembley” me Anglinë, Shqipëria në Tiranë e pret Andorrën në kuadër të Grupit K kualifikues, të cilin e përbëjnë edhe Serbia e Letonia.
