“Kosova ka 1 milion e 602 mijë e 515 banorë”.
Kështu ka deklaruar drejtori i ASK-së, Avni Kastrati i cili ka prezantuar sot rezultatet e para përfundimtare të regjistrimit të popullsisë.
“Nga regjistrimi i vitit 2024 del se Kosova ka 1,586,659 banorë rezidentë. Besoj që regjistrimi ia ka arritur qëllimit, dhe ka kaluar ashtu siç kanë qenë pritjet”, u shpreh Kastrati.
Gjatë prezantimit të dhënave, Kastrati bëri me dije se ka një rritje të ndërtesave – banesave/shtëpitë, prej 21.5 për qind krahasuar me vitin 2011.
Ai ka deklaruar se jemi në top vendet që kemi moshën e re të popullsisë në krhasim me vendet e tjera në Evropë dhe gjetiu.
Tutje, ai tha se numri i ekonomive familjare është rritur për 69 mijë e 505 apo për 23.4%.
Te mosha e popullsisë, rezultatet tregojnë se në vitin 2011, mosha mesatare e popullsisë ishte 29.97 vjet, ndërsa në vitin 2024 është 34.84. Mosha mesatare e femrave është 35.66, ndërsa e meshkujve 34.03.
Ulje ka edhe te dendësia e popullsisë. Nga 159.5 banorë në një kilometër katrorë, ka rënë në 146.9 banorë në një kilometër katrorë.
Ndërsa, kryeministri Albin Kurti ka deklaruar se të dhënat e sotme të regjistrimit të popullsisë janë thelbësore për të gjitha aspektet e planifikimit në gjithë sektorët.
“Sot është një ditë e rëndësishme për Kosovën pasi do të prezantohen rezultatet e para përfundimtare nga regjistrimi i popullsisë, ekonomive familjare e banesave në Kosovë. Publikimi në një kohë krejtësisht rekorde, përben një komponent shtesë pasi që statistikat cilësore marrin kohë e statistikat në kohë janë me vlerë… Regjistrimi është më shumë se mbledhje e statistikave, është pasqyrë e atyre ku jemi sa jemi dhe si mund të ecim përpara… Janë thelbësore për gjitha aspektet e planifikimit. Përfaqësojnë bazën për të hartuar politika të cilat adresojnë nevojat reale të qytetarëve…Ky regjistrim forcon pozitën tonë në ardhmen ndërkombëtare, shënon një përparim të madh për Kosovën”, tha Kurti.
