Gjatë premierës së filmit të animuar “Smurfs” në Belgjikë, reperi ASAP Rocky duket se ka konfirmuar pa qëllim gjininë e fëmijës së tretë që pret me këngëtaren Rihanna.
Teksa po intervistohej nga “Entertainment Tonight”, prezantuesi e pyeti drejtpërdrejt nëse foshnja do të jetë vajzë.
Rocky u përgjigj me një buzëqeshje të gjerë: Po, vëlla, është.
Më pas, ai tregoi me entuziazëm një lodër të personazhit Smurfette, të cilin e dublon Rihanna në film, duke shtuar: “Këtu, këtu”.
Ky veprim u interpretua nga fansat si një konfirmim i heshtur se çifti është në pritje të një vajze.
Rihanna, e cila ishte gjithashtu e pranishme në premierë, shfaqte barkun e rrumbullakosur, duke dëshmuar për shtatzëninë e saj të avancuar.
Lajmin për fëmijën e tretë ata e konfirmuan në muajin maj gjatë Met Gala 2025, duke befasuar publikun dhe fansat.
Sipas një burimi për revistën “People”, çifti është shumë i emocionuar për zgjerimin e familjes.
“Rihanna gjithmonë ka dashur një familje të madhe dhe fëmijë të afërt në moshë, që të rriten bashkë”, tha burimi.
Nëse konfirmimi i ASAP Rocky rezulton i vërtetë, atëherë dyshja shumë e dashur nga publiku do të mirëpresë së shpejti vajzën e tyre të parë, pas dy djemve që kanë së bashku.
