Në orën 10:00 thirrën konferencë për media.
Kryesia e Sindikatës së Pavarur së Infrastrukturës së Hekurudhave të Kosovës “ Infrakos”, këtë të hënë shprehu edhe një herë pakënaqësitë e tyre.
E si brengë më të madhe kishin mos ngritjen e pagës tash e 15 vite.
Hysen Nikqi, kryetar i sindikatës fajtor për këtë e lë bordin drejtues.
“Ka 15 vite që në “Infrakos” nuk është bërë asnjë ngritje pagash, andaj gjendja e punëtorëve është tej mase e rënduar. Kjo ka ardhur edhe si neglizhencë e trajtimit të kërkesave tona nga bordi i drejtorëve. Ne kemi edhe një dyshim tjetër nga informacionet tona që dogana ka gjobitur “Infrakos” me 10 milion euro dhe këto pare i ka gjetur në Qeverinë e Kosovës. Pra këtu është një diskrepancë e madhe se Qeveria gjen pare për me i mbuluar dështimet e bordit e nuk gjen pare për indeksimin e pagave në raport me inflacion në vend”, ka thënë Nikqi.
Po më këtë bord drejtues Nikqi, thotë se nuk kanë pasur takime për gjetjen e një zgjidhjeje për rritjen e pagave.
“Rreth 330 euro për punëtorë fizik, por nuk shkon më lartë as për punëtorët e administratës. Ne kemi kërkuar indeksim të pagave në raport me inflacionin në vend, se me patjetër që do të kërkojmë pastaj edhe ngritjen e pagave. Dy herë Qeveria ka marrë vendim për indeksim për shërbyesit civil që ne nuk na ka prek”, është shprehur tutje.
E kërkesa për rritjen e pagave nuk ishte e vetme çështje e trajtuar këtë të hënë.
“Deri sa nuk gjejmë një gjuhë të mirëkuptimit kërkesa jonë mbetet shkarkimi i bordit dhe menaxhmentit sepse nuk kemi më rrugëdalje tjetër”, ka thënë në fund Nikqi.
Për dallim nga “ Infrakos”, kompania publike “ Trainkos” ka arritur marrëveshje për ngritje pagash.
“Me mbledhjen e datës 27/06/2025, kemi pasur një takim me bordin dhe menaxhmentin e “Trainkos” e kështu që kemi arritur një marrëveshje të lehtë e të mirë, por shumë domethënëse për punëtorët tonë është diku përafërsisht 100 euro..”, është shprehur Gjyrevci.
Nga sindikata e “ Infrakos” paralajmërojnë se në raste të mos gjetjes së një zgjidhjeje do të bëjnë edhe protesta dhe do të ndalin punën.
Televizioni ka tentuar të marr një përgjigje edhe nga bordi i “ Infrakos”, dhe Qeveria, por të njëjtin nuk kanë qenë të qasshëm.
