Partia Demokratike e Kosovës ka njoftuar se nuk do të marrë pjesë në seancën e parë të jashtëzakonshme të thirrur nga Dimal Basha i Vetëvendosjes. Lajmin e ka konfirmuar Sekretarja e Përgjithshme e PDK-së, Vlora Çitaku, për “Tëvë1”.
“Sot kemi pasur mbledhjen e Grupit Parlamentar bashkë me Kryetarin Hamza, dhe ne nuk do të marrim pjesë në seancën e parë. Para fillimit të seancës do të mbajmë konferencë për shtyp”, ka deklaruar Çitaku.
Seanca e thirrur nga Dimal Basha është parashikuar të nisë në ora 11:00 dhe përfshin diskutimin e komisioneve parlamentare, buxhetit dhe marrëveshjeve ndërkombëtare. Ndërkaq, në ora 14:00 është thirrur seanca për zgjedhjen e Qeverisë së re, me mandatar Glauk Konjufcën.
Edhe Lidhja Demokratike e Kosovës ka njoftuar se nuk do të marrë pjesë në seancën e orës 11:00, por vetëm në atë të mandatarit.
Albert Krasniqi nga Demokracia Plus e ka kritikuar këtë veprim të Vetëvendosjes, duke e cilësuar si “të paligjshme dhe kundër rendit kushtetues të shtetit”.
