Ka dështuar për të dytën herë që të mbahet seanca e jashtëzakonshme e Kuvendit Komunal të Prishtinës, në të cilën ishte paraparë që të diskutohet propozim-vendimi për lënie në shqyrtim publik të projekt-dokumentit të Planit Zhvillimor Komunal 2025-2033.
Në seancë e cila ishte thirrur të martën, nuk morën pjesë asambleistët e Lëvizjes Vetëvendosje dhe Partisë Demokratikë të Kosovës.
Kryetari i Prishtinës, Përparim Rama tha se asambleistët e opozitës janë duke e bllokuar që ky plan të del në diskutim publik.
Rama tha se do të tentojnë në seancat e radhës që të del plani zhvillimor në publik.
“E patë edhe sot që ne kemi ftuar seancën e jashtëzakonshme për me e qit në diskutim publik planin zhvillimore komunal, por ja që edhe sot nuk i patëm numrat e duhur të asamblistëve, që ta mundësojnë që ky plan me rëndësi shumë të madhe për kryeqytetin që ky plan të dal për diskutim publik. Ne do të vazhdojmë të tentojmë që ta fusim këtë edhe herën e radhës”, tha Rama, shkruan KP.
Me mungesë të votave po ballafaqohet edhe partia që doli e para në zgjedhjet e 9 shkurtit, Lëvizja Vetëvendosje, pasi edhe sot ka dështuar zgjedhja e kryetarit të Kuvendit të Kosovës.
