Arsenali pritet të hyjë në verë me plane për ndryshime të rëndësishme në skuadër, ku pjesë e tyre mund të jenë edhe disa nga lojtarët kryesorë të viteve të fundit.
Sipas raportimeve të talkSPORT, klubi londinez është i gatshëm të dëgjojë oferta për Gabriel Martinellin, mes interesimit në rritje nga klubet e Superligës së Arabisë Saudite.
Al Nassr përmendet si një nga kandidatët kryesorë për transferimin e sulmuesit brazilian, i cili së fundmi ka humbur statusin e titullarit të rregullt në “Emirates”.
Në të njëjtën kohë, drejtori sportiv i Arsenalit, Andrea Berta, po shqyrton afrimin e një lojtari të ri në krahun e majtë të sulmit, çka mund ta zvogëlojë edhe më shumë hapësirën e Martinellit në ekip.
Edhe pse verën e kaluar 24-vjeçari nuk ishte i interesuar për një kalim në Superligën Saudite, mbetet për t’u parë nëse qëndrimi i tij do të ndryshojë pas Kupës së Botës 2026.
Këtë sezon, Martinelli ka regjistruar 27 paraqitje në të gjitha garat, me nëntë gola dhe një asistim, ndërsa në Ligën Premier ka shënuar vetëm një herë në 17 ndeshje. Vlera e tij aktuale në treg, sipas Transfermarkt, vlerësohet rreth 45 milionë euro.
