Arsenali mund të shkëputet në tetë pikë në krye të Premier Leagues në këtë vikend, kur skuadra londineze e pret Crystal Palacen në ndeshjen e xhiros së 28-të të kampionatit anglez.
Takimi Arsenal – Crystal Palace zhvillohet të dielën prej orës 15:00.
Shkëputja e Arsenalit mund të jetë e mundur për shkak se Manchester City në këtë vikend nuk do të luajë në elitën e Anglisë, për shkak të angazhimit në Kupën FA.
Do ta zhvillojë ndeshjen çerekfinale, në shtëpi kundër Burnleyt të portierit të Kosovës, Arijanet Muriq, të shtunën nga ora 18:45.
Crystal Palace në vikend do të jetë pa Patrick Vieiran, i cili u shkarkua nga posti i trajnerit pas rezultateve të dobëta.
Shkarkimi i Vieiras u bë i ditur të premten në mëngjes nga klubi, pasi Palace nuk kishte fituar në 12 ndeshje rresht.
Crystal Palace ka shënuar vetëm 21 gola në 27 ndeshje këtë edicion.
Ndërkohë, Arsenali është në seri prej pesë fitoreve në ligë, por u eliminua të enjten nga Sportingu i Lisbonës në 1/8 e finales të Ligës së Evropës.
Arsenali është i pari në ligë me 66 pikë, i ndjekur nga City që ka pesë pikë më pak.
Crystal Palace ndërkohë po lufton për mbetje në elitën angleze.
Ka 27 pikë në vendin e 12-të, tri më shumë se skuadra e vendit të 18-të që dërgon një rang më poshtë.
Në këtë fundjavë në ndeshjet tjera çerekfinale të Kupës FA takohen Manchester Unitedi e Fulhami, Sheffield Unitedi e Blackburn dhe Brighton e Grimsby.
