Arsenali nuk ka kohë që ta vajtojë eliminimin nga Liga e Kampionëve pasi menjëherë do të ketë ndeshje të rëndësishme në Premier League.
Arsenali të shtunën nga ora 20:30 luan në udhëtim te Wolverhamptoni, në ndeshjen e xhiros së 34-t.
Arsenali i vendit të dytë ka 71 pikë, sa edhe Liverpooli në vendin e tretë.
Liverpooli luan në udhëtim te Fulhami, të dielën prej orës 17:30. Kjo ndeshje e mbyll xhiron.
Trajneri i “revolveristëve”, Mikel Arteta, ka thënë se Arsenali ende është në garë për titull, por ka shtuar se lojtarët e tij duhet të shfaqin karakter pas disfatës së dhimbshme në Gjermani. Arsenali është në ecuri prej 10 fitoreve nga 11 ndeshje në ligë.
Ndërkohë, Liverpooli duhet të fitojë po ashtu, në mënyrë që të jetë në garë me Manchester Cityn dhe Arsenalin.
Trajneri Juergen Klopp ka thënë të premten se lojtarët që ai drejton duhet të shfaqin dëshirë për fitore, pavarësisht eliminimit nga Atalanta në Ligën e Evropës.
Manchester City ishte fituesi më i madh i javës së kaluar dhe pas fitores 5:1 ndaj Lutonit, doli në krye të tabelës.
Arsenali e Liverpooli u mposhtën.
City në këtë fundjavë nuk do të luajë, për shkak se zhvillon gjysmëfinalen e Kupës FA me Chelsean, të shtunën nga ora 18:15.
Gjysmëfinalja tjetër e Kupës FA luhet të dielën nga ora 16:30.
Coventry ballafaqohet me Manchester Unitedin.
Të dyja këto gjysmëfinale luhen në stadiumin “Wembley” në Londër.
