Policia e Kosovës ka arrestuar tre persona, përfshirë një zyrtar publik, nën dyshimin për keqpërdorim të pozitës zyrtare në procedurat e tenderëve publikë.
Sipas njoftimit të Policisë, gjatë hetimeve janë siguruar prova dhe informata që tregojnë se zyrtari i përfshirë ka ndihmuar operatorët ekonomikë për t’u shpallur fitues në tenderë të caktuar, duke përshtatur në mënyrë të kundërligjshme kriteret e përcaktuara nga autoritetet kontraktuese.
Vlera totale e tenderëve në fjalë tejkalon 8.8 milionë euro.
“Veprimet hetimore janë zhvilluar në bashkëpunim të vazhdueshëm me Prokurorinë Speciale të Republikës së Kosovës, duke përfshirë sigurimin e dëshmive dhe masa të tjera hetimore, përfshirë sekuestrimin e pajisjeve komunikuese,” thuhet në njoftimin zyrtar.
Hetimet vazhdojnë dhe autoritetet premtojnë transparencë dhe ndëshkim të çdo keqpërdorimi të detyrës publike.
