Inspektoriati Policor i Kosovës ka njoftuar se një zyrtar policor është arrestuar të shtunën.
Sipas njoftimit disa ditë më parë hetuesit e IPK-së e kanë pranuar një ankesë nga një qytetare e Gjilanit e cila pretendonte se një zyrtar policor, i fejuari i saj, ka ushtruar dhunë fizike dhe psikike ndaj saj.
“Pas pranimit të këtyre informacioneve, bazuar në veprimet hetimore paraprake të realizuara dhe nga dëshmitë e mbledhura nga hetuesit e IPK-së është siguruar një bazë e dyshimit të arsyeshëm se zyrtari policor i përfshirë si i dyshuar në këtë rast ka përdorur dhunë dhe kërcënime ndaj ankueses”, thuhet në njoftim.
Po ashtu bëhet e ditur se IPK-ja ka rekomanduar suspendimin e tij, ndërsa ka paralajmëruar se veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente.
“Në kuadër të veprimeve të natyrës administrative dhe në interes të hetimit, IPK ka rekomanduar edhe suspendimin e tij. Veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente”, theksohet në njoftim.
Zyrtari i dyshuar është ndaluar për 48 orë.
