Përmes njoftimit, Dogana ka bërë të ditur se personi i dyshuar është i ngarkuar me disa vepra penale që ndërlidhen me mashtrime me taksa doganore.
“Prishtinë 5 tetor 2022, pas hetimeve disa mujore nga ana e Doganës dhe nën udhëheqjen e Prokurorisë Themelore në Ferizaj, është arrestuar dhe dërguar në mbajtje një person i dyshuar për kryerje e veprave penale. Personi i dyshuar është arrestuar pasi ngarkohet me disa vepra penale që ndërlidhen me mashtrimet me taksa doganore, prandaj edhe ngarkohet me: • Falsifikim i Dokumenteve, • Mashtrim, dhe • Shmangie nga Taksat e Detyrueshme Doganore”, thuhet ndër tjerash në njoftim.
Sipas njoftimit, i dyshuari vazhdimisht ka falsifikuar dokumente për automjete me qëllim të shmangies nga taksat e detyrueshme dhe dëmi llogaritet të jetë mbi 500 mijë euro.
“I dyshuari në mënyrë të përsëritur ka falsifikuar dokumente për automjete me qëllim të shmangies nga taksat e detyrueshme doganore dhe si rrjedhojë e këtij veprimi dëmi i shkaktuar llogaritet të jetë mbi 500,000.00 Euro. Si rezultat i veprimeve hetimore dhe operative nga Dogana e Kosovës është arritur të rikuperohet shumica e dëmit të shkaktuar duke arritur të sigurohen taksat doganore”, thuhet në njoftim./teve1.info/
