Një 31 vjeçar nga fshati Zhur i Prizrenit është arrestuar të hënën, si i dyshuar për pesë raste të vjedhjeve të motoçikletave që kanë ndodhur gjatë muajit shtator.
Sipas Policisë, me autorizim verbal të Prokurorit kujdestar, është kryer bastisje në banesën e të dyshuarit, ku gjatë kontrollit janë gjetur dhe sekuestruar substanca të dyshuara narkotike të llojit marihuanë.
I dyshuari është intervistuar dhe me vendim të prokurorit është ndaluar për 48 orë.
Ndërkohë, hetimet po vazhdojnë për zbardhjen e rasteve të tjera të mundshme që mund të lidhen me këtë person.
“Vlen të theksohet se të gjitha motoçikletat e vjedhura janë gjetur dhe kthyer pronarëve legjitimë, falë angazhimit profesional të zyrtarëve policorë dhe bashkëpunimit me qytetarët”, thuhet në njoftim./teve1.info/
