Policia e Kosovës në bashkëpunim me Doganën ka arrestuar një person të hënën, i cili dyshohet se kishte të ngarkuar një automjet me mall të kontrabanduar në Viti.
Sipas njoftimit, të dyshuarit i janë gjetur 43 paketa me proteina të cilat i kishte futur përmes rrugëve ilegale nga Maqedonia e Veriut në Kosovë.
“Njësia e Task Forcës – Lindje gjatë zbatimit të detyrave sipas autorizimeve policore për parandalimin, identifikimin dhe arrestimin e personave të dyshuar kryes të veprave penale, ka ndaluar një automjet të cilin e drejtonte i dyshuari mashkull kosovar me iniciale R. T., tek i cili gjatë kontrollimit të mjetit janë gjetur të ngarkuara 43 paketa me mallra-suplemente (proteina) të llojeve të ndryshme me peshë rreth 210 kg, me vlerë sipas tregut rreth 18.000euro, mall për të cilin nuk kishte asnjë dokument mbi prejardhjen e tij,i cili dyshohet se ishte kontrabanduar përmes rrugëve ilegale nga RMV-RKS”, thuhet në komunikatë.
Lidhur me rastin është kryer edhe kontrolli në një lokacion tjetër të dyshuar por nuk është gjetur sasi e mallrave tjera.
“Të gjitha veprimet rreth rastit janë ndërmarrë në bashkëpunim me Prokurorinë e Shtetit, ku me urdhër të prokurorit kompetent malli dhe automjeti janë dërguar në terminalin doganor-Dheu i Bardhë dhe rasti trajtohet tutje në procedurë të rregullt”.
